हटके अन् ट्रेंडी

‘अगं आई काय या केसांचा कंटाळा आलाय. मी आता हे केस ना कापूनच टाकणार आहे’, असे संवाद बहुदा सर्वांच्या घरात नेहमीच ऐकायला मिळतात. पण लांबही केस हवेत आणि फक्त साधी वेणी बांधून कंटाळा आलाय, अशाही काहींच्या मिश्र भावना असतात. म्हणून काही स्टायलिश आणि हटके वेणींचे प्रकार खास तुमच्यासाठी…

क्राऊनिंग ग्लोरी
क्राऊनिंग ग्लोरी ही वेणी गोलाकार चेहऱ्यावर जास्त सुंदर दिसते. पहिल्यांदा केसांचे दोन भाग करून पहिल्या भागात वेणी वरून खालपर्यंत, सागर वेणीच्या स्वरूपात बांधायला सुरुवात करा. दुसऱ्या भागासाठी पण हीच पद्धत वापरा. वेणी तयार झाल्यावर कानामागील केस पण त्यात बांधले जातील याची काळजी घ्या आणि त्याचा हलकासा आंबाडा बांधा आणि ते पिन-अप करा.

ब्रेडेड अपडू
ही साधी केस बांधण्याची पद्धत आहे. जर एखाद्या दिवशी तुमचे केस व्यवस्थित नसतील ही स्टाइल उपयुक्त ठरू शकते. ही स्टाइल करण्यासाठी पुढील केसांपासून शेवटपर्यंत वेणी बांधून त्याचा आंबोडा बांधा व नंतर पिन- अप करण्यासाठी बॉबी पिन्सचा वापर करा.
फिशटेल ब्रेड
तुम्ही पारंपरिक पेहरावर मॉडर्न फिशटेल वेणी अधिकच खुलून दिसते. लांब केस असणाऱ्या मुलींवर ही अधिक छान दिसते. प्रथम केसांचे दोन समान भाग करून डाव्या बाजूचे केस उजव्या बाजूला टाका आणि उजव्या बाजूचे केस डाव्या बाजूला टाका. केसांच्या शेवटच्या टोकापर्यंत असं आलटून पालटून करा आणि झाल्यावर केस बांधा.

ब्रेडेडच्या मदतीने आंबाडा
जर तुम्ही पारंपरिक पेहराव केला असेल तर ही वेणी तुम्ही नक्की घाला. केसांचा आंबाडा करून वर बांधा आणि वरील केसांच्या दोन बटा घेऊन त्या तसं हलकं खाली सोडा. या दोन बटांना आंबड्याभोवती गुंडाळा नंतर पिनांनी ते बांधून घ्या.

संकलन- दीपाली बुद्धिवंत, कॉलेज क्लब रिपोर्टर, महाराष्ट्र टाइम्स